RÚV hefur sýningar á verðlaunuðu bresku dramaþáttunum Týndir drengir og álfar (Lost Boys & Fairies) í kvöld, mánudaginn 3. ágúst, klukkan 21:30. Þættirnir fjalla um Gabriel og Andy, hommapar í Cardiff sem langar að ættleiða barn.
Gabriel er söngvari og sviðslistamaður á hinsegin skemmtistaðnum Neverland. Hann og maki hans, Andy, hafa verið saman í átta ár og vilja nú taka næsta skref með því að ættleiða barn.
Andy er fullur tilhlökkunar en Gabriel er óöruggari. Ættleiðingarferlið neyðir hann til að horfast í augu við erfiðar minningar úr æsku, fyrri fíknivanda og flókið samband sitt við föður sinn. Þegar þeir kynnast sjö ára drengnum Jake þarf Gabriel að gera upp við fortíðina og spyrja sjálfan sig hvort hann sé tilbúinn að verða faðir.
Týndir drengir og álfar er þriggja þátta röð frá 2024 sem gerist í Cardiff í Wales. Þættirnir eru bæði á ensku og velsku og flétta saman raunsæja lýsingu á ættleiðingarferlinu, fjölskyldudrama, húmor, tónlist og litskrúðug kabarettatriði.
Höfundur þáttanna er velska leikskáldið og handritshöfundurinn Daf James. Sagan er skálduð en byggir að hluta á reynslu hans af því að ættleiða þrjú börn með eiginmanni sínum. James Kent leikstýrir þáttunum.
Siôn Daniel Young leikur Gabriel, Fra Fee leikur Andy og Leo Harris fer með hlutverk Jake. Meðal annarra leikara eru Elizabeth Berrington, Sharon D. Clarke, Maria Doyle Kennedy, William Thomas og Arwel Gruffydd.
Margverðlaunaðir þættir
Lost Boys & Fairies hlaut alþjóðleg Emmy-verðlaun árið 2025 sem besta sjónvarpsmyndin eða stutta þáttaröðin.
Þættirnir hlutu einnig fimm BAFTA Cymru-verðlaun. Þeir voru valdir besta sjónvarpsdramað og auk þess hlutu Siôn Daniel Young, handritshöfundurinn Daf James, leikstjórinn James Kent og klipparinn Danielle Palmer verðlaun fyrir störf sín.
Fyrsti þátturinn er sýndur á RÚV klukkan 21:30 mánudaginn 3. ágúst. Nánari upplýsingar má finna í dagskrá RÚV.
